Tirà zó dal libro "Sta sera ve conto..."
Raconto n° 16 - pag. 140

Tuti i ani ne la so stajon, a le domèneghe e a le altre feste comandà, rivava l'ocasion de far na bela festa. Mi e tuti i bocie se spetava quasi co spàsemo sto dì. Senpre el se svolgéa de dopomezodì e, tenpo permetendo, torno ai posseti. Se el tenpo el gera bruto a se se raunava de soto na barchessa o sóto calche pòrtego.
Come ve diséo sto fato el vegnéa ne le domèneghe e ne le altre feste comandà drento la setemana. Xe ciaro che ne la matina, come in tute le domèneghe, se nava messa par santificar la festa.
A le oto in punto, se nava a scoltar chela del 'fanciullo' e pi tardi, anca par far calcossa, se nava co i genitori a assìster a chela solene che de sòlito la gera cantà.
Tornà casa e fato el pranso eco l'avenimento tanto spetà.
Se se portava drio calche pessa neta par sentarse de sora e no sporcar le braghete de tera e, soratuto, par no inpotaciarle col sugo de l'erba che no se savéa come tirarlo via. Rivà ne la conca (la parte pi bassa de la vale de soto la nostra contrà) se se raunava a grupeti, a seconda de le fameje e el pi possìbil tacà ai posseti.
Có le angurie le gera maure le se le metéa, dopo gaverghe ben lavà la scorza, drento na sporta fata a reticolato. El tuto el se faséa co calma ma tignendo ben presente che bisognava far in tenpo par nar a scoltar le funsion del dopomesodì, a cantar el 'Te Deum' e a ciaparse la benedission, che el selebrante, co sora le spale el pivial e sora la testa el velo omeral, l'inpartìa co l'ostensorio d'orà.
Me ricordo che portavo le 'pepe' de vernisa nera lussidà. Le se fermava co la lingueta, che la se blocava col so boton utomàtico de assal. Le jera na finessa! Le braghete curte, a mezo galon, le stava tignù sù co le tirache, chele de làstico. La camiseta gera a meza mànega, bianca de lissia, col coleto rotondà e le capete le jera rifinìe a man. Le calse bianche le rivava ben de sora del zenocio e le vegnéa tignù sù da na stringheta lastica pissegà a l'orlo de i pantalonsei.
Da par tuto se faséa alegro ciasso: se ridéa, se zugava, se se coréa drio. Se stava co l'aquolina in gola e co i oci senpre dosso a la boca del posso. A ogni anguria tirà sù, come se la fusse stà pena catà, s-ciopava on batiman e el pi longo el gera al primo tajo. Dopo seguìa la spartission de le fete e la magnada. Se tornava casa contenti e felissi, convinti de gaver vissùo na bela zornata.
Va ben che lora jero bocia de sié ani [...]