A tante persone i venti molà da le bufere, che se xe costreti a subìr nando vanti ne la vita, a le volte i te seca memoria e ànema de i tenpi andà e, in particolar, la vena vèrgine de l'aqua de fonte de la linpia, par senpre persa, felisse infanzia. Drento de noialtri resta la mora e nuda rocia da la qual la sgorgava par no tornar mai pi. Solo par puchi, de bota, nasse da i scunti misteri sconossùi de l'ignoto del spassio e del tenpo la vosse amà de na persona tanto, tanto cara che, da l'abisso de on son fondo e muto la te sussura:

«Sù, Tonio, conta chel che ti te ghe ne la memoria de có te geri on bel putel co i oci come el siel, colmi de felissità e de fantasia. Conta e scrivi come ca te go insegnà mi, ca te si bon e brao!».

On afano, de paca, el te struca la canàgola, el core el sconbate dando de volta: el xe on svejarse col magon come chel de un che el stà anegàndose e che, pena pena, el ghe la fà a no sbrissiar for dal caredon de la vita, na bissabòva de buridon de passion che no se pol contar.
Gero stà ramenà drento de mi da chela barafùsola e, nel pien de la note del sete de lujo del novantasete, me só svejà no pi el stesso: mi jero on altro col cor levro de la chiete de na infanzia ricatà.
Só vissùo "randajo", sensa mojer e sensa on fiol: destinà a sparir nel vodo, sensa gnente lassar.
Ma, desso, narò drio al caldo sol de on sogno amonitor e sostegnù da la tanto amà vosse de me Mama, ussìa da i abissi del spassio e del tenpo, co l'amor e la sapiensa, che i stà al de là del tenpo, farò chel che ela, afetuosamente, la me ga sugerìo!